Улаанбаатар хотын замын хөдөлгөөний түгжрэлийг бууруулж, Туул, Сэлбэ, Дунд голын орчимд олон нийтийн соёл, амралтын тохилог орчныг бүрдүүлэх зорилттой “СЭЛБЭ СЭРГЭЛТ” төслийн ажлын хэсгийн ээлжит хуралдаан өнөөдөр 2023.09.13-ны боллоо. Хуралдаанаар Сэлбэ сэргэлт төслийн ТЭЗҮ, зураг төсөл болон газар чөлөөлтийн ажлын танилцуулгыг хэлэлцлээ.

“Сэлбэ сэргэлт” төсөл нь техник, эдийн засгийн үндэслэл, зураг төсөл боловсруулах болон барилга угсралтын ажлыг гүйцэтгэх гэсэн 2 үндсэн үе шатаар хийгдэж байгаа бөгөөд геодези, инженер геологи, байгаль орчны үнэлгээ, ерөнхий төлөвлөгөө, тохижилт, зам, гүүр, далан, инженерийн шугам сүлжээ, усны барилга байгууламжийн зураг төслийн ерөнхий гүйцэтгэгчээр Нийслэлийн “Хот төлөвлөлтийн судалгааны институт” ОНӨААТҮГ ажиллаж байна.

Зураг төслийн дагуу Сонсголонгоос Дамбадаржаа хүртэлх чиглэлийн 21.6 км зайд 6 эгнээ бүхий авто машин, нийтийн тээврийн үйлчилгээнд зориулсан замыг 36 том, дунд, жижиг гүүр, 9 туннель, 48.6 км явган хүний зам, 21.6 км унадаг дугуйн зам, 44 км үерийн хамгаалалтын барилга байгууламжийг байгуулна. Ингэснээр Улаанбаатар хотын түгжрэлийг бууруулж, голын дагуух иргэдийн эрүүл, аюулгүй орчинд амьдрах орчин нөхцөл, инженерийн бэлтгэл арга хэмжээ сайжрах юм.

Энэхүү төслөөр барих далан, зам, гүүрийн тохижилтын ажлыг 3 багцад хувааж үе шаттайгаар гүйцэтгэх ба энэ онд эхний ээлжийн бүтээн байгуулалтыг Нийслэлийн үнэт цаас арилжаалах замаар татан төвлөрүүлсэн эх үүсвэрээс санхүүжүүлж хийнэ.

Барилга, хот байгуулалтын сайд Ц.Даваасүрэн Нийслэлийн удирдлагуудад ажлаа шахаж, төслийн бүтээн байгуулалт, тэрдундаа далан барих ажлыг эхлүүлэх бэлтгэлийг шуурхай хангаж, гүйцэтгэгчтэй гэрээ байгуулан, инженерийн байгууламж болон газар чөлөөлтийн ажлыг энэ сард багтаан дуусгах үүрэг чиглэл өглөө.